Geschiedenis

In 1957 is de vastelaovesvereniging veur ’t eers opgerich bij Nie vanne Kuup (Lamerights) in Zampert, ein gehuch van Ittervoort waat loog tösse ’t kanaal en ’t dörp. Kefee Biej Nie waas zowaal ’t kluplokaal van de sjötterie es pelies van de Puinesjödders. In de proklemasie is de Prins van de Puinesjödders nog sjteeds heerser euver Ittervoort en Zampert (noe industrie-terrein Santfort). De Prins van ’t sezoen ‘72/’73 mot nog altied aaftraeje omdet de vereiniging midde in ‘’t sezoen opheel te besjtaon, omdet d’r te min raodsleje euver ware. In desember 1980 is de vereiniging weer nuuj laeve ingeblaoze onger de naam De Puinesjödders 1980. Vanaaf det sezoen haet de vereiniging zich blievend good kinne prissentere aan de vastelaovesveerders van Ittervoort.

Wie komme de Puinesjödders aan häöre naam?

‘Puine’ is ein soeart ónkroed, det vreuger nao de wintjer op ut veldj en op akkers begós te gruuje. Ut waas ein sterk ónkroed mèt flinke wortele en mós veur ut zejje en poeate verwijderdj waere. De puine aafsjóffele haaj geine zin. De wortele inne grondj spronge namelik opnoew oet en vermieërderdje zich. Ze móste mèt eine spesjaale puinereek oetgedaon waere. Mèt de puinereek mós men den de zandj oet de wortel sjödde en de wortele móste vervolgens inne zón druuege. Op die meneer verdordje de wortele en ginge ze kepot. Ut waas alóm bekindj det d’r väöl puine veurkwoome in ut gebied tösse de dörpskern van Ittervoort en ut kanaal Wèssem-Nederwieërt: baeter bekindj es Zampert. Zampert (tegewoeardig veur ein groeat deil ingenómme door industrieterrein Santfort) waas ein klein gehucht det veurnamelik bestóng oet zo’n 15 boorderieje en ein kefee; kefee bie Nie (van Kuueb) (Nie Lamerigts). De vastelaovesvereiniging De Puinesjödders is dao in 1957 opgerichtj en danktj häöre naam dus aan de puine die in det gebied gesjödj waerdje. Naodet de vereiniging later in röste is gegange en in 1980 noew waerdje ingeblaoze, is de verwiezing nao Zampert blieve bestaon. Ut is auch daorom det eedere Prins(es) van De Puinesjödders nog altied regeertj euver ut riek van Ittervoort en Zampert.

't Monument

’t Toenmalige besjtuur in 1999 haet d’r zich hel veur gemaakt om ein beeldj van de Puinesjödders te realisere zodet de Puinesjödders ein eige plekske krege wo de vastelaovendj aafgetrap en aafgesjlaote kos waere. Lambert van de Ende, Frank van de Heuvel, Michel Rutten en Har Voermans höbbe d’r veur gezorg det ’t beeldj waerde gemaaktj. ’t Monument, es simbool van de vereiniging, waas eine grote puineraek en 11 klein raekskes waat de Prins en ziene Raod van Ellef verbeeldje. ’t Monument waerd noe eder sezoen gebroektj om de vastelaovend te äöpene op de ellefde van de ellefde en aaf te sjloete op dinsdigmiddig mit ’t puinverbranje. 't Monument is gemaaktj in 1999 en sjteit aan de Leliestraot.