Prinses Lina I
Wae stellen uch veur aan oos hooghede veur Vastelaovendj 2025. Dit jaor zal Prinses Lina I (Parren) mèt häör adjudante Lars (Adams) en Loes (van Osch) regere euver ut riek van de Puinesjödders.


De Prinses vertèltj…
Ut is eindelik zoeaver, ich bön Prinses!
Det ‘eindelik’ is neet euverdreeve, want ut begos al in september 2023. Ut woor kirmis in Ittervoort. Ich haaj mèt vorst Jim gekaldj euver ut feit det de vereiniging eine noewe website wol en det ich dae waal veur häör wol make. Enthousiast euver det ich det mocht gaon doon, woor ich al nao aan ut dinke euver wie ich ut boewe van de website aan ging pakke. Toen raakdje ich weer in gesprek mèt Jim. Ich dacht det ut nog effe euver de website zooj gaon, mer hae kwoom inins mèt ein totaal angere vraog: ‘Wils dich volgendj seizoen Prinses zeen?’
Ut ieërste woea ich aan mós dinke woor ut LVK aan ut begin van det jaor. Wae haaje dao mèt Prins Paul I en zien gevolg eine gezellige aovendj gehadj en op waeg trök nao de bös vroog Jim of ut mich leuk zooj lieke om oeats Prins te waere. Ich zei det mich det zeker leuk zooj lieke. Vaere oppe kop is altied al eine droum gewaesj! Mer ich bön d’r altied vanoet gegange det det toch noeats zooj gebeure. Vaere zeen namelik veur de Prins en neet veur de Prinses. Zoea zeen we in gesprek geraaktj euver det ongerwerp. Zooje we ein Prinses kinne höbbe in plaats van eine Prins? En mot ze den ut kruuenke op of zooj ze toch vaere oppe kop kinne drage? Ut woor ein interessant gesprek, woeabiej ich d’r achter kwoom, det de vereiniging toch waal veur ut ein en anger oeape stuit.
Trök dinkendj aan det gesprek, haaj ich geliek ein antwoeard veur Jim: ‘Tuurlijk wil ich Prinses zeen!’ Zoea höbbe we nog effe gekletsj euver wie det d’r den oet zooj zeen. Ich goof aan det ut mich hieël vèt leek om den de steek mèt vaere oppe kop te zètte. Zooj ich den auch ut prinsenpak aandoon? Nao ein kort gesprek, waat nateurlik neet op mocht valle, haaje wae al ein hieël plan klaor.
En dao begos ut. Op vastelaoveszondig, nao de optocht, höb ich aan Loes gevraogdj of zie miene adjudant wol zeen. Get later volgdje de ieërste vergadering mèt de vorst Jim en Bram. Vervolgens höb ich tiedes eine spelkesaovendj Lars gevraogdj es twieëdje adjudant en toen volgdje door ut jaor haer nog get vergaderinge mèt z’n vieve.
Ut woor ein spannendj jaor, mer noe is ut den zover: ut seizoen is begós!
Mien adjudante en ich höbbe d’r al hieël väöl zin in en ich weit zeker det we d’r mèt z’n alle ein geweldig seizoen van gaon make!
De vastelaovendj is veur mich altied ein van de drökste tieje van ut jaor. Ut is eeder jaor weer un verrassing waat mich ut kommende seizoen weer te wachte stuit. En auch dit jaor woor det zeker weer ut geval…
Van kleins aaf aan, bön ich al van hoes oet actief mit de vastelaovendj. Altied mèt geloupe inne optocht, opgetrooje oppe bontje aovendj en gevaegdj oppe trom inne kapel! De aafgeloupe jaore auch lid van V.V. De Flupkes en de raod van C.V. De Puinesjodders.
Ich höb al un bietje ervaring op moge doon. Zoea bön ich in 2023 al adjudant gewaes van Prins Paul 1, bön ich in 2024 Prins gewaes van V.V. De Flupkes en in 2012 Jeugdprins van Ittervoort.
Ich höb d'r enorm väöl zin in om same mèt mien vriendin Loes, Prinses Lina te moge ongersteune kommendj seizoen. En geluif mich, wae gaon d'r mèt z'n alle ein gigantisch fieëst van make!
Miene naam is Loes van Osch. Ich bön geboeare en getoeage in Bieëgdje, in ut Jokerriek. De vastelaovendj zitj mich in ut blood. Van kleins aaf aan weurdj bie ós thoes good gevierdj. Ich höb auch dökker métgeloupe inne optocht. Meziek en gezelligheid spele ein groeate rol tiedes de vastelaovendj en daorom speel ich al jaore oppe sjuuftrómbone inne Prinsekapel van Bieëgdje.
Dit jaor zal ut dao get stiller zeen, want ich höb deze vastelaovendj anger planne, hie in Ittervoort bie de Puinesjodders; es adjudant van Prinses Lina 1, same mèt Lars.
Toeval of neet, mer dit jaor höb ich mien eige jubileum. Ich bön namelijk 2x11 jaor gewoeare!
Minse zègge auch dök taege mich, det ich écht laef veur de vastelaovendj en det kloptj auch hieëlemaol! Ich kiek d'r oprecht ut ganse jaor nao oet.
Ich bön benuudj wie ich ut dit spesjaale jaor gaon ervare, omdet ich nog noeats adjudant van 'n Prins(es) bön gewaes. Aafgeloupe jaor bön ich toevallig waal zelf Prinses gewaes van VV de Flupkes, mer det is toch nét get anges.
Ich hoeap det we 'n sjiek sezoen gaon kriege, same mèt alle Flupkes, Puinesjodders, Lars en natuurlijk Prinses Lina 1.
Laot ut sezoen mer snel beginne! Alaaf!
Jeugdprins Mex I en Jeugdprinses Stella
Wae stellen uch veur aan oos jeugdhooghede veur Vastelaovendj 2025. Dit jaor zeen det Jeugdprins Mex I (Vries) en Jeugdprinses Stella (Adams), samen mèt häör adjudante Liva (Sniekers) en Willa (Botter).


Jeugdprins Mex I
Leef Puinesjödders en Puinesjödderinnekes,
Ich zal mich efkus vuuerstèlle. Miene naam is Mex Vries. Ich bön geboeare in Wieërt, mer getoge in Ittervoort. Ich woean den auch al 13 jaor same mèt mien pap, mam en broor oppe Fresiastraot.
Om nog slummer te waere, gaon ich nao sjoeal in Remunj. In miene vrieje tied game ich gaer of kiek ich nao TikTok filmkes. Auch gaon ich gaer örges lunche. Miene hobby is scouting. Hout hakke en knuip lègge kin ich den auch es de bèste.
Toen ich gevraogdj waerdje es Jeugdprins, hoofdje ich neet lang nao te dinke en höb ich geliek ‘JAO’ gezag. Same mèt Jeugdprinses Stella, oos adjudante en alle anger vastelaovesveerders, gaon we d’r den auch eine super sjoeane vastelaovendj van make!
Jeugdprinses Stella
Leef Puinesjödders en Puinesjödderinnekes,
Naodet ich veurig jaor de smaak te pakke höb gekrege, moog ich dit jaor weer d’rbie zeen! Dit kieër neet es adjudante, mer es prinses. Waat eine geweldige ieër! Ich bön super gruuets. Mien vader waas jeugprins in 1991. En noe, zoeaväöl jaor later, is ut eindelik mien beurt om veurop te gaon.
Al dik 11 jaor kómptj gae mich tieëge in Ittervoort en omstreke. Ich woean mèt mien aojers en mien broor lekker röstig op ut pittoreske industrieterrein. Op dit moment zit ich nog in ut lètste jaor vanne basissjoeal. In miene vrieje tied marsjeer ich veurop es bördjesdrager bie de sjötterie: St. Margaretha Ittervoort same mèt St. Petrus Kelpe-Oler. Daonaeve galoppeer ich op ein paerd in Thoear en bön ich aktief bie Jóng Nederlandj in Itter. Ich höb ut d'r mer drök mèt… en mien aojers auch.
Mer de kómmendje waeke stuit det allemaol oppe 2e plaats. Mèt Mex, Liva en Willa höb ich super väöl zin inne Vastelaovendj. Det stuit noe op 1! Same mèt Prinses Lina en häör adjudante zultj gae neet om ós haer kinne. Wae make ein groeat fieëst!
Hola, bèste minse van Ittervoort,
Ich bön Liva van Roel van Jos van Sjaak vanne Tump en ich moog dit jaor same mèt Willa es adjudante jeugdprins Mex en jeugdprinses Stella biestaon.
Ich woean al 11 jaor mèt mien 2 groeate breurs en pap & mam oppe Concordiastraot, woea ich op mien slaopkamer geboeare bön. In miene vrieje tied bak ich gaer get lekkers vuuer angere. Verder bön ich drök mèt sporte, want ich doon aan freestyle skiej-je, voetballe en Krav Maga. Ich bön auch nog lid van Jong Nederlandj in Itter.
Ich höb d’r hieël väöl zin in om d’r same mèt ooze jeugdprins Mex, jeugdprinses Stella en adjudante Willa eine geweldige vastelaovendj van te make.
De vereiniging
In 1957 is de vastelaovesvereniging veur ’t eers opgerich bij Nie vanne Kuup (Lamerights) in
Zampert, ein gehuch van Ittervoort waat loog tösse ’t kanaal en ’t dörp. Kefee Biej Nie waas
zowaal ’t kluplokaal van de sjötterie es pelies van de Puinesjödders. In de proklemasie is de
Prins van de Puinesjödders nog sjteeds heerser euver Ittervoort en Zampert (noe
industrie-terrein Santfort). De Prins van ’t sezoen ‘72/’73 mot nog altied aaftraeje omdet de
vereiniging midde in ‘’t sezoen opheel te besjtaon, omdet d’r te min raodsleje euver ware. In
desember 1980 is de vereiniging weer nuuj laeve ingeblaoze onger de naam De Puinesjödders 1980.
Vanaaf det sezoen haet de vereiniging zich blievend good kinne prissentere aan de
vastelaovesveerders van Ittervoort.
’t Toenmalige besjtuur in 1999 haet d’r zich hel veur gemaakt om ein beeldj van de Puinesjödders
te realisere zodet de Puinesjödders ein eige plekske krege wo de vastelaovendj aafgetrap en
aafgesjlaote kos waere. Lambert van de Ende, Frank van de Heuvel, Michel Rutten en Har Voermans
höbbe d’r veur gezorg det ’t beeldj waerde gemaaktj. ’t Monument, es simbool van de vereiniging,
waas eine grote puineraek en 11 klein raekskes waat de Prins en ziene Raod van Ellef
verbeeldje. ’t Monument waerd noe eder sezoen gebroektj om de vastelaovend te äöpene op de
ellefde van de ellefde en aaf te sjloete op dinsdigmiddig mit ’t puinverbranje. t Monument is
gemaaktj in 1999 en sjteit aan de Leliestraot.


Wae höbbe in al die jaore al hieël get Prinse gehadj bie CV De Puinesjödders. Jónk en aod, mèt Prinses of mèt adjudante, ut kan allemaol. Bekiek hie ooze galeriej.